مش من زمان
سليمان بختي
مش من زمان
كان بلدنا أحلى بلد
متل الولد وأعز من ولد الولد
أحلى شمس وأحلى فيّ وأحلى ميّ
وأطيب عالم
كنا نترجّى بكرا يتأخّر شوي
ومبارح يضل معنا
واليوم نعمل فيه ميّة شغلة
كنا نحلم ونتذكر
وننام نوم الهنا والأمان
ونعيش متل كان يا ما كان
***
مش من زمان
كان عنا بيتين
بيت ببيروت وبيت بالجبل
ونشتاق للتنين
ونكون كلنا مع بعض
كلنا يعني كلنا
لا حدا سافر ولا حدا راح
لا حدا جنّ ولا حدا ضاع
وكل واحد بمطرحو
عزيز وأمير
***
مش من زمان
حضرنا فيروز ببعلبك
وقفتْ بأعلى دراج القلعة
وصرخت:” أنا شمعة على دراجك
أنا نقطة زيت بسراجك”
ونحن دبنا متل الشمع
وشهقنا متل الدمع
وبالرجعة كنا ساكتين
متل اللي راجع من زيارة مباركة
وتارك شوي من قلبو عالدراج
وشوي من ذاتو بالسراج
***
مش من زمان
كنا نضحك كتير
متل الموعود بالمحبة بالفرح
ويرسم الحياة على الورق
وتطلع أحلى من الورق
كيف خلص النهر وسكتت الكلمة
كيف طار هالزمان
وشو صار بأهلو
وكيف صرنا بلبنان
متل اللي رايح عالجحيم
وماشي على مهلو…
