حبِّك دَمار…
لميا أ. و. الدويهي
اليوم القلب محتار
مش عارف أيَّ مَيلة يختار
تا يقلب عليها جنبو
من دون ما يزيد وجعو…
آه يا بيروت!…
يا بهجة النُّفوس
وللدِّني كلها عروس
ومنديلها عالعالم بيلوح…
لو مهما حاولوا الأشرار
منِفديكي بالأخيار…
بيروت!… صار حبِّك دَمار
ولأجلِك اولادنا تحت التراب…
كرمالِك منرضى بالمَرار
بس الموت قهَّار
سرق منَّا ضحكات الزغار
وآمال الكبار…
كيف منِّك منِزعل
وإنت للكون كلُّو مَشعَل؟…
ارتاحي يا بيروت
الأمهات عم يسقوك بالدموع
من لمَّا حضَنتِ بين الضلوع
فلذات أكبادون والرُّوح…
يا عروس الرُّوح!
يا قلب لبنان المجروح!
اليوم عمدبحِك تجمَّعِت الحشود
تصلِّي وتضرع للقدُّوس
يقبل هالتَّقدمات
المدفوع حقَّها آهات
تا يبقالنا لبنان
متل ما الله رسمو منذ بدء الأكوان…
٤ /٨ /٢٠٢١
