شو حلو الكبر
زياد كاج
شو حلو الكبر ع العمر لما يطل،
بيخاد معو زعل هالدني
تفاصيل وهم كتير،
ومنصير متل شجرة معمرة
متل شي ظل،
والزغار حولنا بيسألوا:
” شو بكي ..وشو بني؟”
“وشو الفرق بين فقير.. وبين غني؟”
ونحنا منعرف بعد لحظة المشوار
انو الكل.. متل الكل.
شو حلو الكبر ع العمر لما يطل
وما بيتركلنا الا شم الياسمين والحبق
وشرود المغيب
قبل ما نفل.
لا الزعل لا الكبر لا الهم،
ما بيهم.
المهم شفنا الغيم وموج البحر
وعصافير ع غصان الشجر،
وبالبرد دفيت ليالينا
وبالشوب قلنا خي.
المهم انو شفنا حالنا بالغير،
مرايا كانوا لوجوه سمعنا حكاياتها
وما احكينا.
شو حلو الكبر لما يطل
متل فنجان قهوة صبح
متل شفة شاي ع غفوة قمر
متل سبحان خالق نجوم السما
قبل ما نفل.
