عمر تاني
سليمان بختي
يا عمر قديش قضينا سوا
فيك تقول عِشرة عمر
فيك تقول صرنا صحاب
شو تزاعلنا بالأول وما فهمنا بعض
أنا بدي إكبر بسرعة
وإنت ماشي ع مهلك
على ستمية مهلك
أنا بدي العمر من الأول
وإنت متل آخر همك
هيدا العمر إذا ما فهمتو
بيضيع وبيضيعك
هلق صرت متلك
ماشي على مهلي وعلى مهلك
بتعرف صرت عزّك
صرت متل أهلي
وبدونك رح إهلك
* * *
يا عمر
يا حجرة وقعت ببركة مي
وفي ناس عم يتفرجو
الحجرة بتغرق
وعلى الصفحة بتعمل دواير دواير
والناس بيفلو
وبعد شوي بترجع
الصفحة رايقة
كإنو ما كان
كأنها ما كانت
شو انكتب وشو ما انكتب
كأنو ما صار شي
هيدا العمر
بتفكر انت صاحبو
وبيطلع هوي صاحبك
بتفكر انك قطفتو متل ما بدك
بيطلع متل ما بدو قطفك
يمكن بتعمل هيك يا عمر
حتى الحياة تستمر
لا أنا ولا إنت
* * *
بدي خبرك سر
بتعرف مين طمّعني فيك
الحلم … إيه الحلم
أخدني على طريق
ما فيها شي بيشبهني
أو بيشبهك
ياريت هالعمر حلم
كنا على الأقل
نمنا وفقنا
وعشنا عمر تاني
وعرفنا انو هالعمر
مدري لمين تخمين
بس أكيد مش إلي ولا إلك
