نقطة وسطر
سليمان بختي
مين بيحرّك وراق الشجر
مين بيصنع المطر
مين بيدوّر القمر
مين بيوقع الجبل
وبلحظة بيختفي البحر
مين نحنا ونايمين
بيوزع الأحلام على البشر
مين واقف وراء الزيح
وبيتجلّى
وإنت بتفكر وبتسأل
وبتنام وبتفيق وبتحلم
وبتصلي وما بتوصلو
مرات كأنو حدا عميلعب
برق ورعد وشتي وطوفان
حرايق وزلازل وبراكين
ويا ويلي من الغضب
ومرات شمس وهوا وفي
وريحة زهور…خي
ويا عين على النعمة
ليش دايما في طريقين
صيف وشتي
ليل ونهار
خير وشر
جنة ونار
شو معتر هالإنسان
لا بهالدنيا ملحق
ولا بهالآخرة مخلص
متل اللي ناطر شي
وبيضل لآخر لحظة ناطر
ومعليش الحق عليي مش عليك
هيدا الأمل
بيبرم حولك وحواليك
جايي على حصان بطيء
جايي يضحك عليك
ودايما ما بيوصل
مع إنك بتسمع طرقاتو عالباب
ومع إنو بالبال والخاطر
شو الحل
في شي متل غليان الضو
بيضل يدق يدق وما بيتعب
لما تخاف لما تحب
لما تغضب أوتعصب
هيدا قلبك
وبقلبو كل شي شفتو
برات قلبك
وبتعيش وبتحاول تحميه
من كل أسى وكل قهر
وما بتعرف كيف ومين
بيضويه وبيطفيه
ولا مين بيحط نقطة ع آخر السطر.
