شاعر الكورة الخضراء عبدالله شحاده مُكرّمًا في مجلس حواس الفن
في جلسته الثانية لعام 2023 كرّم مجلس حواس الفن شاعر الكورة الخضراء عبدالله شحاده ضمن حاسة الوفا في عنوان: الغائب الحاضر شاعر الكورة الخضراء عبد الله شحاده بحضور ابنته الشاعرة ميراي شحاده.
يأتي هذا التكريم ضمن مجموعة من التكريمات تتالت في الأمسية على النحو التالي:
-حاسة الكلام: الشاعر نعمان الترس.
-حاسة اللون: الفنان التشكيلي برنارد رنو.
-مختار الحواس: الفنان القدير جوزيف عازار .
-حاسة النغم: الموسيقي المغني الفنان ريبال.
-حاسة حرّة: “إمرأة غينيس” كارولين شبطيني. وقد تغيبت عن الحضور لظروف قاهرة خاصة.
أقيم الحفل في مسرح القصر البلدي-جديدة المتن برعاية وحضور رئيس بلدية الجديدة-البوشرية-السد الشاعر والملحن أنطوان جبارة ونخبة من أهل الفكر والثقافة والفن والإعلام.
أدونيس الخطيب
قدّم الشاعر والأديب أدونيس الخطيب (رئيس مجلس حواس الفن) حاسة الوفا : الغائب الحاضر شاعر الكورة الخضراء عبد الله شحاده، بكلمة جاء فيها:
ميراي… ما بدي إحكي معك اليوم…
بدي إحكي مع بيّك وإسألو… أي نوع من الوفا مرق بتفكيرك… تا تحوّلت الفكرة جينات وتشكلت بصيغة مرا… وجبتها عا هالدني… وليش؟
هلقد ما بتحب الموت… أو بتزهق كتير من السكوت…
قلي… ما في حدا عم يسمعنا…وسرّك كبير…
قلي…آآآه عارف إنو سرّك انكشف…
ومبسوط قاعد مع قنديل حالك… عم تشرب شعرك مقفّى…
صارو 6 مجموعات شعرية وأدبية… عا رفوف ما فيها غبرة…
عارف؟
وعارف إنو عم بتضوي لروحك لمرافقتها …شموع من ورق..؟
إي شموع من ورق… لهلق صاروا شي 36 شمعة…
كتب منشورة عا اسم روحك حاملة اسماء حلوة بتكتب حلو…
عم تختارها تتضويها بكل مطرح…
شموع الورق ما بتخلص…
تعبير غريب؟… ممكن…بس إنت وهيي وصلتوني إلو…
ليش عم تضحك… يبدو حابب توصلني لأشيا كتير حاسك…
مش غلط…اللعب بين الهون والمش هون وباقي هون ممتع…
بس عبالي خبرك شي… ومش بالسر…
فيك تخبّر عنو كل الأرواح اللي شفتا بطريقك…
اللي عندو بنت متل بنتك… بتحداه يقدر يموت…
ميراي شحاده
بدورها ألقت الشاعرة ميراي شحاده كلمة من القلب جاء فيها:
مسا الوفا
الوفا عالم بحد ذاتو ما منعرف إنو وفا غير ما نشوفو بعيون الآخرين.
أنا كنت متل هالطفل اللي مسك التراب، حكي عنو الشاعر نعمان
جرّب يعمل بيّ لأنو بيي قرر يتزوج بعرف الستين ويعمل عيلة وأنا بنتو الكبيرة وغادرنا بعمر الـ75 وأنا عمري 10 سنين
شو بعمل؟
مسكت التراب ما طلع معي بيّ، مسكت وراق ما طلع معي بيّ قررت إجمعلو المجموعة الكاملة إلو ما ارتويت.
خلصت المجموعة وعملت الحفل وعرّفت الناس عن عبدالله شحاده وعن قوافيه ورسالتو وشو كان يعمل وما ارتويت.
شوي بلشت حس إنو بيي حواليي عاهالوراق اللي خلقت من عيون شعرا ودواة حبر جديد، طعم جديد على كل صفحة كتاب بيحمل اسم منتدى شاعر الكورة الخضراء. كنت حس إنو بيي خلق من جديد من رحم هالمنتدى وأنا بنتو اللي خلّفتو من جديد.
شكرًا لمجلس الحواس اللي سمحلي اليوم إحكيكن عن عبدالله شحاده وإحكيكن عن هالجينات اللي أنا حاملتا جواتي منو، ودايمًا بحس حالي مقصرة، ودايمًا بحس حالي إنو بعد في كتير ما اعطيت، ويمكن بسألو راضي عن اللي عم بعملو؟ بيطلع فيي من فوق بالضباب بالشمس بالمدى البعيد بحس عم يضحكلي وبيقللي الله يرضى عليك يا بنتي.
كل واحد بيكتب كلمة إن كانت أدب أو شعر، كل واحد بيمسك ريشة، كل واحد عندو شي يقولو ما بيموت، يمكن بينتقل بالجسد من محل لمحل تاني منشان هيك الشعرا ما بيموتوا.
أحد الفلاسفة قال: ما راودتني فكرة إلا وسبقني شاعر إليها.
لو قدّر للشعراء أن يحكموا هذا العالم لكان أفضل.
أنا يا جماعة بحب بيي كتير وبشتقلو يعني ما حسيت بالطفلة، بعدني طفلة اليوم بس اقريلو بحس هالزلمة كان عندو رسالة. أنا ما طبعتلو مجموعتو الكاملة بس لأنو بحب بيي، إنما لأنو آمنت بأفكارو وكان عندو رسالة تربية للنشء وقت بيقول:
وفي أرائكهم أذناب أمّتهم/ والشرّ أن يحكُم العُقّالَ أشرارُ
اليوم عم نعيش بنفس السفالة.
هالزلمة قال قصيدتو الشهيرة وطلعوا عليه بدن يعتقلوه وهرب من باب المسرح.
هيدا الزلمة كتب ضمن اشعارو إنو الشاعر يقرع باب الأمجاد.
كيف ما بدي أوفيه بضلني مقصّرة.
شكرًا لكم،
شكرًا لهلمساحة من النور والوفا اللي خليتوني إحكي فيا عن بيي.
وبيي متل كل البيّات ما بيموتو بس لأنو شاعر هوي خلد ذاتو.
أنا اليوم مني إلا عم زيح شوي شوي هالصخرة عن قبرو،
لأنو الله خلقنا عا صورتو ومثالو وحبيت قلدو شوي لربنا بركي بطلع بيي من قبرو.
شكرًا لكم.
