الميلاد في لبنان
د. عبد الحافظ شمص
ميلاد سيّدنا المسيح بهالدّني
ميلادُ عصر النّور والعَيْش الهَني
لكنّما لبنان في هذا الزّمان
فيه الشّعب جوعان، والحاكم غَني
***
والحُكم عِنّا مسخرة ومَجْمَع ولاد
أَصل البلا، والفُقر في كلّ البلاد
سَرْقوا رغيف الخبز من تِمّ العباد
ولبنان، خايف يًنْشَرى بسوق المزاد
مِن بعد ماكان بحياتو مِغْتِني !!!
***
خِفيوا تَعَب هالنّاس، أَولاد الحرام
ماعاد فيها النّاس تاكُل أو تْنام
تحرَّم عليها تْعَيِّد بعيد السّلام
وما عاد ينفع شِعْرنا، وكُتْر الكلام
مرْقوا سنين وهالسّني أَصعب سِني
***
بلبنان، أَهَل الحُكم، ماإلهُن أَمان
وببلاد كلّ النّاس، ما إلْهُن مَكان
الحاكم عميل وضدّ شعبو، أٍو جَبان،
والجُبْن بيخلّي سلاطين الزّمان
قدّام أَضعف شعب راسُنْ ينحني!!
***
وَيْن الكرامي، ُمش رَح تلاقي جواب
حُكَام جهل وذُلّ وجنون وعذاب
تلاتين عام، تْحَكَّموا فينا الذّئاب
وتسكَّرت بِوجهنا كلّ البْواب
ببلادْنا، كلّ الأمور مْسَوْدَني !!!
***
ببحور أموال الخزاين، عايمي
حْكومات “كِلباني” وقِيامي قايمي
نار الحرب فوق المنابر حايمي
وعيون أهل الحُكم بعدا نايمي
مات الحَيا، والأَمر مَنّو ولْدَني !!!
***
الحاكم بأَمر المال، كذّاب وحقير
عايش مَلَك، والشّعب ببلادًو فقير
وخايِف يا رَبّي، يطول هالأمر العَسير،
وخايف على لبنان من سوء المصير
وأَوْتارْنا بإيد العدوّ مْدَوْزَني !!!
***
هَوِّن عَلينا، يا إلٓه العالمين
حتى نعيش، وقلب حاكمنا يلين
بيكِفي أَسى بقلوبنا، وشَوْق وحَنين
للعَيْش، نحنا وأهلنا هالمؤمنين
أٍبناء أَحمد، والمسيح بْهالدِّني …