شبعان… والله إلا من نورك حبيبي
زياد كاج
يا مسهّل العُمر
ما تعجّل…تمهّل،
ولا تسلّملي ع حدا
وبالبوسات فيك تبخل،
مشتاق أنا،
ومن هالدني
شبعان،
والقلب للشفة ملان.
يا مسهّل هالعُمر
يا راسم هالقدر
تمهّل…..تمهّل.
شبعان… والله ومكتفي
من النظرات، من الحكي،
من زيح البحر، من الضحك
يل خيو البكي.
شبعان وملّ مني الضجر،
يا قاضي البشر
يا مفتفت الصخر
يا مجنّن البحر
يا راسم حظّ
الجبّار والمظلوم،
الفقير والغني
كلن تحت الحجر.
شبعان ومكتفي،
من شطحِة الغيمات
من رقص أغصان الشجر،
من سكب المي
من جبين الجبل،
من خضرة السهلات
من تلج العواصف
ومن غمز النجمات
وضحكات القمر.
شبعان…. والله
من الوجوه المروسة،
من الثرثرة
من خنجر الغدر،
من صبايا بيفتحوا الشهوات
متل نبع مي بعد ثلجة ع جبل،
من حكي الكبار
كل ما قرّبوا من القبر
وأنا متل غيري…ناطرني السفر،
وبعيش مية عيشات
وبموت مية موتات،
وبضحك ع صدى ضحكات
وببكي مع كل دمعة ع خدّ البشر.
شبعان… والله
إلا من نورك حبيبي..
يالإنت أنا
مدري أنا خيالك
مدري إنت خيالي؟
حبيبي فراشة
من الضو بيخجل
ومن الشمس بيغار،
حبيبي أنا
روحو ريش نعام
مشغولي
عيونو…. رمش الغزال،
شفافو… طفل ما انفطم،
لمساتو… طيف المنام
نظراتو… عصفور حط وطار،
وقلبو ثلج
ما ارتطم.
حبيبي ما بينسى حدا
برفّة جناحو
بيفوح عطر الياسمين
عالبقيو معو وع يلّي راحو
حبيبي…..
نغم أوتار العود
وصدى كمان مجروح
وشهقة شرق….. ما بيشتكي.
حبيبي…. منو بيغار الجود،
أصيل متل جمل صاحب الصحرا وصبر،
متل فرس أصيل كرار حتى النصر،
منتلي نفس آدم وحوا
وعيسى ومريم ونوح.
بيغرُف ويعطي
من رحمة محمد،
من صدق بيو لبكر
من عدل سيفك يا عُمر
ومن بابك يا علي
ومن وين قبرك يا فاطمة،
ومن آخر نفس بكربلا
وصرخة زينب
ما أطولا….
وكل يوم بيركع
لو ما ضل حدا يركع،
وكل يوم بيحلم
بسحر السما،
ومن آذان الفجر
وصوت جوهرة عاصي
بيعصر إكسير المسا.
يا فنجان قهوة الصبح،
من الركوة لا تزعل،
يا قشوة النشوة،
أبيض يا فنجان
متل قلب حبيبي
يالما بيعرف إلا الصفح
مهما الكيل طفح.
من صيحات الرعيان
من دعسات الحصّادين
من صبحيّات النسوان،
مع شكّ الدخان،
من شرط بالحقلة
ولا خناقة عالبيدر،
من منجيرة الهوا
مع أغصان الشجر،
من خرخرة مي
بإيد فلاح
معلّى البريق،
تكون صوتك حبيبي.
يا مسهّل العُمر
لا تستعجل ع حبيبي،
وخلي دربو
أطول من دربي
شبعان أنا ومكتفي،
إلا من حبيبي
وشوفتو فرحان
وهوي بعد ما شاف من هالدني
إلا كمشة زهر
وشويّة ضحك
وشبع من البكي
تا كبرت عيونو..
نقزة غزال.
وما شمّ إلا
شويّة حبق،
ونصيبو كان شحيح
من بخل غربال.
يا ميسّر العُمر
خفّف حمل حبيبي
وسهّل عليه الدرب،
وزيح من دربو
كباب الشوك
وشرّ البشر.
ولا تجرب حبيبي
وتزيد
بعد كمان،
جرحو بعد ما اندمل،
وجراحي بعدا معلّمة،
وصارت أشطر معلّمة،
وصرت متل الصخر
متل سنديانة
بنطوي….. ما بنكسر.
بحّار أنا
والريح ملعبي
ما بحلم بمينا
ولا وين ترمينا
أنا ومركبي.
لكن حبيبي ما بيعرف يعوم،
وخايف حبّات مسبحة هالعُمر
تفرط وما تدوم
من كتر ما بكي،
تغارت منو
النبعات والغيوم.
يا مسهل هالعُمر
مساح جبين حبيبي
كلّ ليلة قبل ما ينام،
وحميه من كلّ ضرر
من كلّ كابوس بالمنام،
وباركو بالعزّ والحُبّ
والسكينة،
ليكفي مشوارو
متّكل وقنعان،
وزرعلو بقلبو
شتول التقوى والإيمان،
لأنو بستاهل بساتين
مش بستان
من الفرح والسلام
والحنان..
اييه…. هيدا حبيبي.
يل من شهدو ما بيرتوي العطشان
ويل بيصالحك مع الدني
مهما كنت زعلان.
يا مسهّل هالعُمر
عامهلك ع حبيبي
وطفيلو الشمس لينام،
الفراشة من عشقها للضو
ما بتنلام.
نقي من حبّات مسبحتي
وعطيها لحبيبي
بيعمل منها عقد ياسمين للسهر،
بيعمل منها موّال ع ضوّ القمر.
