الوقت هدية
جاد حرب
بي وقت الحلوين كتار
من برا مش من جوا
فكرت بالاستقرار
كل آدم بدّو حوّا
قالولي بنت الضيعة
بعدن عقلاتا براسا
هينة بسيطة وطيعة
محبّة لأهلا وناسا
قلت الضيعة حلوي بآب
من ميلة بشوف الشباب
ومن ميلة بمشي بمشروعي
قبل ما يهرّ اللي شاب
وصحيت ب هونيكي يوم
الحرارة تخطّت عمري
رطوبة وشوب وقلّة نوم
حايص محتار بأمري
قلت الهيئة مالك غير
الضيعة وجوّا ونسماتا
وفيها بتلاقي يا طير
عصفورة من بنيّاتا
ركبت السيارة وافكاري
شي بيجيب وبيودّي
كيف رح بيكون نهاري
ومين ال رح تخطف ودّي
دَخَلت بهاك الحارة
من بعد سنين غياب
وكل حجرة من حجارا
بتذكرني بماضي غاب
بالماضي كان في جارة
قلبي بعيونا داب
يمكن صارت ختيارة
وشعرا هالاسود شاب
الحرّ اللي جوّاتي كان
اكتر من حرارة آب
تحوّل حنين وحنان
ارجع لاقي اغلى حباب
والفرح اللي حسيّتو
فجأة تحوّل مرارة
ما في حدا حاكيتو
كان يعرفني يا خسارة
والبيت اللي رباني
عالحب وعالحنان
مش معقولي ينساني
مهما طال الزماني
مرقت ولقيتو مهجور
حيطانو تعباني كتير
وانطفيت نار التنور
حتى نشّف ميّ البير
ب خطوة تقيلة وحزينة
رجعت على المدينة
ساعتها عرفت مزبوط
كيف ضاعت احلى سنيني
بيقولو الوقت هديّة
عروف وقتك كيف تعيشو
عمرك مش كلّو طاووس
زاهي ونافش بي ريشو
خلّي فرحك بساطة
أشيا زغيري ومهضومة
عمرك بيروح فراطة
ان فتّ بهيكي منظومة
أمّا مشروع الزواج
من راسي شلت الفكرة
ل عزوبيّة احلى تاج
الماضي روّحتو يا شريك
ليش بدي روِّح بكرا
