رقصات للحبّ…
لميا أ. و. الدويهي
غنَّيتَك للحب موشَّحات
بتنطرب إلها الآذان
ولمَّا بتخرق المسام
بتسكن عمق الأحشاء
بتندَه للأحباب
بتوحِّد الدقَّات…
عَزفتَك بالأنفاس
للعمر نغمات
بتنعش الإحساس
بتفرفح الكيان…
لوَّنتَك لوحات
فيها دروب وإيَّام
منمشيها سوا حياة
بتتحاكى فيها النظرات
بتتشابك الأحلام
بتتِّحد الخطوات…
مِنلملم جراح
منداويها بالحنان
منضويها تحت جناح
الاهتمام إلو عنوان
والإصغاء مفتاح
والصَّبر نجاح
والثَّبات إتِّحاد…
قدَّامك!
كل الفنون
تراقصت بجنون
واحتارت كيف لعندك
بدَّها تروح
وتحملَّك من ذات الرُّوح
ثمار الحبّ المشلوح
عكتف وادي غامر بين الضلوع
قلبَك الولهان الحنون
الساكن فيه قلبي المَعشوق…
٨ /٦ /٢٠٢١
