إنتَ الأقوى…

لميا أ. و. الدويهي

راجع من زمان

كنَّا فيه بالماضي أحباب،

تقلِّي إنَّك مَوجوع

وإنُّو الألم زادَك هموم…

يا رَيت بلمسة إيد

بمسَح عن هاك الجبين

طعجات خيَّطها الهم

ولبَّسِتَك تَوب الغَم…

تعا نرجع للجذور

وسوا نعالج الموضوع

مش يمكن بكلمة أو بلفتة

ترجع عهاك الشفاف البَسمِة؟…

دولاب الإيَّام

ما بيتدحرج بالمقلوب،

ولمَّا بيمشي لقدَّام

ما بينطُر اللي عأمرو مَغلوب…

بتعرف شو؟…

إنتَ أقوى من كلِّ الظروف…

إِرمِ وراك كل شي راح

واتطلَّع بأحلى نغمات

بلسَمِتلَك الجراح

ورَدِّتلَك عُمرَك اللي فات

وكرمال ضحكة من عيونها

بتهون الأهوال وظنونها…

إنتَ الأقوى بالإله

اللي عليه بترمي الأحمال،

فيه بتنهض من جديد

معو بتحقِّق كل شي بيفيد

وعحياتك السعادة بتجيب

لمّا بتتصالَح مع ماضيك…

 

٣٠ /١٢ /٢٠٢١