بيت نمل

 
قزحيا ساسين
 
ما معا وقت
سألو النمله إزا كان إلا خْيال، قالتلن: “ما معي وقت تا إتطلّع”.
عتيقَه
النمله العتيقه بتزتّ حبِّة القمح، وبتزيح من درب الفيل، وبترجع تاكلا… طحين.
اشرَحلي
قال السبع: “أصعب شي الموت من الجوع”. قالتلو النمله: “اشرَحلي”.
بالمتحف
النملِه بتفوت عالمتحف مع الزوّار، وبتتفرَّج عا عضام الديناصور.
مدرسِه
النملِه أوَّل مدرسِه مجّانيّه.
صيف
النملِه بتصيِّف… بالشتي.
ختيارَه
النملِه الختيارَه بتعكِّز عالقشِّه هيّي وحاملتا عا ضهرا.
أوَّل متيلِه
أوَّل شي بتعلّمو النملِه لَ بنتا إنّا تحمل الشمس عا ضهرا.
بـ عربيّة الخَيْل
رِكبِت النملِه بـ عربيّة الخيل، صار بدّا تشدّ الحصان بـ دَيْنتو.
أحلا وأبشع
أحلا شي بالنمل إنّو متل بعضو. وأبشع شي بالنمل إنّو متل بعضو.
إبن الصيف
ماتت النملِه. بِقي إبن الصيف بلا جازِه.
عالتاج
النمله اللّي عربشت عا تاج الملك أوّل السّوّار.
عسكر
النمل أوَّل عسكر بيمشي ورا بعضو وما بيِدعَس نملِه.
راس بـ راس
النملِه ما بتعربش عا جبل سكّر. بتزقّو حبِّه وحبِّه من تحت تا يصير راسو عا سْوِيِّة راسا. (https://maxnovahealthcare.com)
العَوَض بـ سلامتكن
فِيا النمله تخيِّل عا ضهر القطيع بس شو بدّا بـ منخار الراعي؟
ما بقا بدّا
السّبع الجوعان بيمِدّ لسانو عا بيت النمل.
بالعرين
سأل غزال لئيم نملِه زغيرِه: “وين بيتكن؟”، قالتلو: “بالعرين”.
هيك وهيك
النملِه الغبيِّه بتعربش عالسنبلِه. النملِه الزكيِّه بتنطر عالبيدر.
طربوش
مش كلّ نملِه عربشِت عالطربوش لِبْسِتو.