"يا حاملِه بالشِّعِرْ تاجْ المملكِه"

 
علي بكري
 
 
أ – الوردِه النديِّه وْراقها عِملو سَبَقْ
غلّو بشَعـرِكْ فلْ، ياسمين وحبَقْ
ولمّا العِطِرْ من ورِدْ إيدكي عَبَقْ
النّحل اشْتَلَقْ، صوبِــــكْ مَــــرَقْ
مونِة سِنِه من شَهِدْ بسْمَاتِكْ سَرَقْ
 
م– من وين جبتي هالحلا ونور السِّنِه؟
بنتِ “الوجيه” لْ كانْ فيها يعتني
حْروفِكْ نِدي بَلَّلْ وْراق السَّوْسنِه
وْحِبْرِكْ سَقى العَطشانْ مَنِّكْ هَيَنِه
كلِّكْ على بَعْضِكْ يا أمَـــلْ بِتْجَنِّني!
 
ل– لَيْكي الأحبَّه اليوم كيف تجمَّعو
بقصر الأونيسكو يقشعوكي ويسمعو
متل الملوَّحْ يعشقو ويتلوَّعو
وْعَ فراق ليلى لو بكِي يبكو مَعو
 
ن– نورِكْ يا حلوِه هلّ عَ السَهرَه وظهَرْ
والله قمرْ، رشّي مطرْ،
حتى بصحارى عْمارْنا يطلعْ شَجَرْ
حتى حنين قلوبنا ينسى الضَجَرْ
وناخدْ من الأفكارْ زوّادة سفرْ…
ا – إنتِ أمل أيّامنا وكل الحكي
بيِّكْ عَ شكلِكْ كانْ بالدنيا ذكي
جودي عَ منبرشِعِرْ دخلِكْ تكتكي
وخلّي العنادِلْ من هديِلِكْ تشتِكي
يا حاملِه بالشِّعِرْ تاجْ المملكِه…
 
ص– صِفّي حروفكْ عَ الورَقْ غطي المدَى
حتى الصَّدى يوَصَلْ على خْوابي النَّدى
خلّي الفِكِرْ يعزُم رْفاقِك عَ الغدا
سُفرِة حِبِرْ، سُفْرِة شِعِرْ….
كلُّن إجو….بيروت ما فيها حَدا…!
 
ر– ردّي علينا بِشِعْرِكْ الصَّافي دَوَا
شوْب الدِّني ، من جنينتِكْ نسمِة هَوَا
عطشانْ قلب الشِّعِرْ بِدْيارِكْ هَوَى
يشرَبْ عُطُرْ إيدينْ”ناصرْها” روَى:
إنّو الشِّعِرْ من حِبِرْ إيديكي ارتوى!!!
*مهداة من الشاعر علي بكري، ممثل وزير الثقافةريمون عريجي، إلى الشاعرة أمل وجيه ناصر في حفل توقيع ديوانها “صرخة امرأة”