من دفاتر كْفَرشِعر
الموت
إيلون هليّل
في خْيال تاني لِلْ إنسان، ما إلو لَون، وما بينمحي بِلْ فَيّ، هوّي لْ مَوت.
***
لْ وِلـادي ولْ مَوت: عينَين لْ حَياة.
***
عمرنا هوّي لْ وقت لّي بتستعملو لْ مَقابر تَ تحضِّر حالـا تستقبلنا.
***
حلو لْ واحد يفرِّص منِلْ حياة ساعة لْ بَدّو !
***
لْ مِشكلي بِلْ مَوت، إنّو في ناس بتموت قَبل غَيْرا، لـازم غَيْرا يموت قَبلـا.
***
منُولَد منِلْ مَوت، ومنموت بِلْ حياة.
***
أنا عايش حَدّ لْ حياة، مِش فيا.
***
كلّ مَ إمرُق حَدّ لْ مَقابر، بِتطَلَّع صوب مقبرتنا تَ شُوفا إزا عَم تشوفني جايي. عَم تقصَر لْ مَسافي بَينا وبين تطليعة عينَيّي !
***
بينطرنا لْ مَوت، كأنّو الصبح الشَغلتو يطلَع.
***
لّي بيموت، بيكون كِبِر أكتر شي.
***
بَعدو راسي فَوق كتافي .. غَصب عَنّو.
***
لَيش “إجباري” نعيش ؟!
***
عَم تتجرَّب لْ حياة فينا.
***
في ناس ما إلُن مطرح إلّـا بِلْ مَوت.
***
أجمل شي بِلْ مَوت إنّو بينضِّف !
***
بسّ لْ مَقبرا ما فيا كزب، لْ مَوت مِش كزّاب، وما حَدا بيقدر يكزُب عَلْ مَوت.
***
بيعيش لْ إنسان مع شو بيعمل، وبيموت مع شو ما بيعمل.
***
قَوْلكُن لْ إشيا لّي منعملـا بِ السكوت، منسمعلـا صَوْتا بِلْ مَوت ؟!
***
مشكلة النوم، إنَّك بتُوعا مِنّو !
***
بيجي يوم، وبيعمّرو فيه لْ بَشَر بيوتُن .. نزول.
***
لْ إشيا لّي بتعملـا عَلْ أرض، بياخِدا لْ مَوت. لْ إشيا لْ ما بتعملـا عَلْ أرض بتاخِدا معَك عَلْ مَوت، يمكن تعملـا هونيك.
***
آخر شتي، وفْراشات لْ مَيّ في عَ جْوانحُن لَون النهايي.