منجل وسنبلِه
قزحيا ساسين
بَيدَر مناجِل
السنبله بتعرف المنجل اللي جرَحا، ولَو كان بـ بيدر مناجل.
انشالله
لمّا وصل المنجل، قالت السنبله لَ إختا: “صَلّي تا نتلاقا بـ زات الرغيف”.
عصفور
المنجل اللي حصَد السنبله،حصد العصفور معو بَلا ما يدير بالو.
نوم الهنا
السنبله اللي ما بتضحك للمنجل ما بتنام عا زند الحصّاد.
تعزيب
ما عزَّب السنبله إلاّ المنجل التلفان.
تقيل
المنجل زنّار تقيل عا خصر السنبله.
عَدّ
المنجل اللي بيلتهي بـ عَدّ السنابل، بْيِجي غَيرو يحصدا.
بلاها
ما انقهرت السنبله من المنجل، إلاّ لأنّو صبَّحا بالخير قبل ما يقصّا.
سنبلتَين بـ منجل
المنجل بيشيل السنبله من الحقل ومن عَين الحصّاد، بالوقت زاتو.
قبْل القمحَه
يللي بدّو يعمل حصّاد، بدّو يزرع المنجل قبل القمحَه.
مش بـ عَينو
السنبله يللي مش بـ عين المنجل، أَكَلتلو من حَدّو.
وحْدِه بـ وحدِه
المنجل يللي بيوجعو قلبو عالسنابل، بيقسّي الحصّاد قلبو عليه
غِيرِه
مرت الحصّاد بتغار من السنبله لْ بتنام عا زندو.
غبيِّه
السنبله الغبيّه بتشوف بـ حالا إزا كان المنجل لْ عم يقصّا من دهب.
شو خَصّا؟!
الحصّاد اللي بيجرحو المنجل، بيسبّ عالسنبله.
آخرَه
آخرة المنجل بالقبو، والسنبله عا مايدة العيد.
ما بتفرق
شو بتفرق مع السنبله إزا كان دمّا بـ رقبة المنجل، أو بـ رقبة الحصّاد؟!
شحادِه
السنبله العاليه بتشحد القمحَه من السنبله الواطيه تا يصير إلا مطرح بـ عين المنجل.
مش هالقدّ
يمكن السنبله بتنطر المنجل تا يجي، بسّ ما بتوعّي الحصّاد من النوم.
تنَين
الحصّاد الناسي منجلو بالبيت، سمع السنبله الطويله عم بتقول:”صرنا تنَين بلا غَلِّه”.
علامة استفهام
المنجل علامة استفهام، بتقصّ… ما بتسأل.
بكي
بكي المنجل، لأنّو ما قِدِر يجرح السنبله أكتر.
بتصِير
المنجل اللي حصد الحقل، وقع عا إجرين آخر سنبله.
قهر
مش قاهر المنجل إلاّ حبّة القمح اللي علْقِت عا حَدّو، ومش قادر ياكلا.
مش شغلتو
المنجل ما بيوعّي سنبله من النوم، المنجل بيطوِّلاّ نومتا.
زُلّ
حسَّت حالا السنديانه أزغر من السنبله، لمّا الحطّاب رفع عْلَيا المنجل… مش الفرّاعَه.
وحْدو
السكّين، والخنجر، والسيف، بيقصّو السنبله. ما في غير المنجل بيحصدا.
انْوَهَل
شاف المنجل السنابل طويلِه، نسي إنّو بيقصّا من تحت.
دوا
كلّ السنابل اللي شكيو همُّن للمنجل، ريَّحُن منّو.
قشّ وحديد
منجل الحديد بيتلفو قشّ السنابل.
ما في داعي
مش مطلوب من الخبّاز يعرف المنجل من السنبله.
معقول؟!
المنجل افتكر السنبله المليانه منحنيِّه إلو.
بـ عَرَق جبينا
الحصّاد بيشتري المنجل بـ حقّ السنبله: السنبله بتموت بـ عرق جبينا.
عالقدّ
ضحكة المنجل دمعة السنبله.
بلا حيا
المنجل اللي بيقصّ السنبله بالحقل، بيروح يعزّي فيا عالبيدر.
سنابل
السنابل بيفَيّو عالمنجل بـ يوم الحصيدِه.
بلا حصيدِه
الحصّاد بيقول:”يا ربّي بلا حسيده”، والسنابل:”يا ربّي بلا حصيدِه”.