الشاعر نعمان الترس قرأ بـ… فنجان الورق مع الأب والابن ..
يوسف رقة
..رح نحكي كمان بالعامية مع صديقي الشاعر نعمان الترس يللي إجا ع مسرح بلدية الجديدة مبارح حتى يوقع ديوانه بالعامية ” قراية ..ب فنجان الورق ” ..
كان واقف عالباب عم يستقبل ضيوفو ، ولمن وصلت ، سلمت عليه وقلتلو ” والله يا نعمان ما قدرت غيب عن توقيع ديوانك مع إني معتكف عن كل الانشطة الثقافية ” شنكلني وفتنا سوا عالقاعة ليبلش الاحتفال .
الاعلامية جويل فضول دعت الحضور للمشاركة بإنشاد النشيد الوطني اللبناني ، وبعدين كانت المفاجأة الكبيرة لمن دعت سايد الترس بيو للشاعر للمنبر ليحكي عن نعمان وكيف بلش يكتب الشعر ، والمفاجأة الأكبر لمن طلع عالمنبر سايد إبنو للشاعر حتى يعلن قديش هوي فخور باخواتو الكتب يللي نشرهم بيو نعمان الترس .
الشاعر الياس زغيب متل عادتو زين المنبر قصايدو الحلوة ، وبعد منو إشتعلت القاعة بالدهشة والتصفيق للشاعر ابراهيم شحرور يللي القى قصايد عن نعمان وضيعتو ” أصنون ” الزغرتاوية ، وبعدين حكي الشاعر حبيب يونس عن الشعر وكيف لازم تكون القصيدة ، ومسك الختام كان مع الشاعر نعمان الترس يللي تشكر الحاضرين وقرأ بعض القصايد من ديوانو الجديد.ِ
قبل شوي ، مرقت ع بعض القصايد بالكتاب ، وحبيت إسأل الشاعر ليش عم تكتب بعض الاحرف على غير ما هي، ما اختلفنا انو الشعر من العامية ، ونحنا منقدر كتير الشعر المحكي، والشعر النبطي كمان، بس شو المشكل اذا كتبنا: ثانية بدل سانية , او ذاتو بدل زاتو، كمان ذاكرتي بدل زاكرتي، وكتير إشيا هيك مش عم اعرف سببها وليش ؟؟ يمكن زمان كانو يكتبو هيك، بس هلق يا صديقي مش لازم نضل هيك ،،
شعرك يا صديقي كتير حلو ، ومضات فيها مغازي وصور ، وكتير من باقات الورد ، وانا بحب انقل لاصدقائي باقة من هالبستان بتقول انت :فيها
بزكر ( بذكر ) قبل ما يشلح تياب الدني
كان جدي دايخ ب هاك السنه
وقت اللي قلتلو الأرض بتدور
قلي : يا جدي عرفت حالي شو بني .
