“نعمان… الحلو”

إبراهيم شحرور

بيروت شو حلوه قبل ترم الفطار

عم تنطر المدفع بجوعاراضيهِ

بتبْقى خدودا صفر وعْيونا زغار

بتكرّ آخر خيط من شمس النهار

تا تشرب العتمِه عَ معدِه فاضيِه

***

لمّا بِشهر الصوم نعمان الحلو

قلّي إنِت معزوم قلتلّو: حلو!

تعوّدت عا أكل الحلو بعد الفطار

معقول عازمني تَ إفطرعالحلو؟

***

قلبَك جْنيْنة ورد يا نعمان

واليوم شهر الورد عنّك ما فرَق

أيّار خبّى بْدفتر الألوان

الوردهِ اللي وقْعت عن سطح نيسان

لما العطر بكْنيسة العدرا احترَق.

وكتابك قريتو من العنوان

فنجان عاشكلو ببالي ما مرَق

لاكن أنا مَ قريت بالفنجان

بعرف إلك بصمِه بْشعِر لبنان

مش ناطرك تبصم بفنجان الورَق

***

سْألت الفرح أصنون وين بتكون

قلّي الضيعهاللابسه توب العرِس

والفيّ قلّي: شتلة الزيتون

بتموت لما غير هون بتنغرِس

سألت الشعر من وين يا مجنون

عم تقطف الشهقه عن شْفاف الخرِس

ما قال من أصنونهالملعون.

وحدو الشعر بيقول عن أصنون :

الضيعه اللي فيها بيت نعمان الترِس.

***

كتابك متل جرّه شهقلا البير

بترشح حبر تا تشرب الميّهِ

وْبتغطّ عَ غصون الحكي عْصافير

تْنَقوِد شعر بقلام مبريّه

بقرا بفنجان الورق بكّير

وبعمل مع الكلمات صبحّيه

مَا بحطّ حدّي علبة سْواكير

ما عاد صدري يشفق عليي

كلما قريت بْلفّ سطر زغير

وبيضلّ ريحة حبر عاديّي

ومن بعد ما كتابك قريتو كتير

بلاقي قصايد فيه ممحيّه

مدري الحبِر من فرحتوبيطير

مدري أنا أْكلتن بِعَينيّي

****

(*) ألقيت في احتفال توقيع  ديوان “قراية ..ب فنجان الورق” للشاعر نعمان الترس الجمعة 10 أيار 2019 على مسرح بلدية الجديدة السد.