التعتير رقم 3
شريف فارس بارود
صَرلكُن بتسرقو الوطن حتى من قبل ما فرنسا عملتلكُن ياه جمهوريّة طوايف. واليوم عم تسرقو جَيشو. إيدَيكُن الطويلي بتضلاّ أقصر من بْواريدو.
وبتقولو إنو الجيش مْفَضّي الخَزيني بحقوقو ومعاشاتو، وعم “يسرُق” مصريّات لبنان. إى، الجيش “سرّاق”، عم يسرُق محبّة الناس من دربكُن، وعم بيغطّ بعيون الأطفال، لون الأمل بْ بكرا فاضي من ولادكُن، ويعبّي الوطن بُطولي.
سنة الجايي بِلْ 2020 رَحْ تحتفلو بالعيد الـ 100 لولادة “لبنان الكبير”، وقَبلا بْ سني، يعني السني، ظَبطت (مِش من ولا ظابط) معكُن إنّو منطعمي العسكري بِ 3500 ليرا بالنهار. بتخايل إنّو حَد Henri de Jouvenel اللي عطانا “لبنان الكبير”، كان في حَدا عم “يحسبا” متل ما هلّق إنتو بتعملو “مْوازني”. أكيد مِش عم بحكي عن اللبنانيين اللي اشتغلو تيكون “لبنان الكبير” لأنُّن أصلَن ما بيعرفو شو يعني “مْوازني” وكانو ساقطين بالـ mathématique، وفَكَّرو بعقلية خوري ضَيعا، وسياستجي مْرِتّ، وحَرامي مملعَن. غِلطت فرنسا لِمّن صَدّقت جدودكُن…الله لا يسامحا.
عم بتخايَل عسكري ع الحدود فاكك ممشط سلاحو اللي عاملو Tupperwear لَ رصاصاتو اللي بيحمي فيا لبنان، ومْفَضّي البارود من هالرصاصات وعَم يعملُن شُوربا، من بعد ما أكل كل علَب المرتديلا والجبني “البَعدو مِش مدفوع حقُّن”. بس مِش عم بتخايل “لبنان الكبير”، الكَيان الهلّقي، بَدّو يعيّد عيدو الـ 100 مع des politichiens مَنَعتُن يستعملو الرقم 1 من زمان تَ يعدّو لِلْ 100 (الرقم 1 إلي وللجيش)، وصارو يعدّو هيك: التعتير رقم 2، التعتير رقم 3…
التدبير رقم 3 حاطط الجيش 25 ساعا بالنهار تَ يحميكُن من غضب الناس. تخايَلو هجم عليكُن الشعب بْ ضافيرو اللي إلو سنين بيجلّخُن عَ مْسَنّ الفقر والقهر والتعتير، وتتلفنو للجيش وما يجي لأنّو مِش بالتدبير رقم 3 ! تعتير…وتعتير رقم 3.
مين بيحمي لبنان الكَيان من ترويحو الجوّاني؟! مين بيحمي لبنان الكيان من “البرّاني” اللي نافخلكُن جيابكُن؟! وإزا الجيش كَبّ قنبلي بْ جَيبة كل واحد منكُن، بس تنفجر، مِش بس رَحْ تطرطش الوطن بِلْ مصاري المسروقا، رَحْ تطرطشو زِلّ ونفاق ومَحارم موسّخا…ومشان هيك ما كَبّ القنبلي.
السقوط الكبير ما بتمنَعو كاميرات بتراقب تقديم الـ terminal. وما بعرف إزا بعد بيمنَعو أمر “تأهّب”، مِش للجيش…لِ السَوْرا !!! (https://www.cbnasia.org)
