كتاب… مُش للمكتبه

نعمان الترس

صار في كتير كتب بِـ “سوق القصيده”… بيوتنا ضاقو ورفوف مكاتبنا شقشقو… الشاعر قزحيا ساسين مش كاتبلنا كتاب متل كلّ هالكتُب…

هيدا اللّي صارو عدد دواوينو ١١ بدّي إشهدلكن لأنّي بعرفو… ما عَدّ وَلا حَسَب قدّيش صار العدد… قزحيا ساسين ملتهي… إيه ملتهي بالتعب مش بالقلم… هيدا الشاعر الوحيد اللّي شفتو هالقدّ بينقّط تعب قبل ما ينقّط آخر حبر القصيده… ما حدا بيعزّب الورقه هالقد قبل ما يمضي…

قزحيا مش كاتبلنا كتاب… مصمّملنا عرش بالورق لْ ما بِيجعّد… قزحيا بيحبّنا وشايف عيوننا ملوك…

“باب السما أحمر ” مش رح يكون للمكتبه… المكتبه مقبرة الكتب… هيدا الكتاب رح يكون حَدّ التخت أو عالطاوله يللّي بـِ صدر البيت أو صديق مشاويرنا الرايقه… كتاب بدّو يرجّف أصابيع ويسحب حبال التطليع… بدّو يِسمَع شهقتنا من رنّة دهب عناوينو… كتاب بدنا نطعّج كل طراف وراقو تَـ نعلّم شو عَلَّم فينا…

قزحيا مش كاتبلنا كتاب… قزحيا نبي قوافي عم يبشّرنا بالشِعر… لاقونا الليله تا ترجعو معكن كتاب… مُش للمكتبه.