الدني إم … وبيّ
مارون أبو شقرا
بيت أهلي خلف منّو في بطل …
حامل ع ضهرو الشمس يوميّه !!!!
وتحت باطو الريح غنّيه !!!
كفّي وشو همّك ما بتوقع يا جبل ..
مسنود كتفك ع كتف بيي !!!
***
ولا يوم هابن او فزِع أو عسّ …
يضرب بكرباجو اللي عدلو مباركو
وبِ كل فشخه الفوق عم بيشاركو …
لا خاف صلب ولا رجفلن ، بس
أوجع من الحربه وقت ما حس ،
انو في مرّه كان بيّو تاركو …..
***
اللي كان شقفه من صخر مشقوف
ما عاد عمرو يحمل وقوفو
واسم الدوا ما يقشع حروفو
ت ضل بيّك بس عم بيشوف
كل اللي انت مش عم تشوفو
***
شوفُن : خميره بينزلو حبوب العرق!!!
لوما يشرّو قلوب ما بيخمَر نبيد ،
وْلا بالدوالي كانت بْتُضوي عْنَقيد …
ضوّ اللي عَ جبينو تحت تختَك مرق،
لمّع برق تَ ضلّ صباطك جديد !!!
***
عمرو شي عشره …. وسمّك النفناف …
كمام الفقر بتقول صيفيه ….
وجبين عالي كتير ما بينشاف،
العزّه ع وجّو تلال جرديه …
قلّي : “أنا من الموت كيف بخاف
وجوات عتم المقبره بيي ” !!!!
