غمرِة شَوق
عنتر رزق الله
قالو ما عندك إم تَ تبكيك
بحر الشتي خلقان من كِمَّك
عم يشمتوا بأيلول كلن فيك
أخبار حكيو ونشفو دمَك
بهالعمر مش رح نقدر نكافيك
بيكفي القمر عم ينحسد منَك
محتار كيف بيقدر يراضيك
يقطف حلا من ضحكتو ل سنَك
كِحل الصبايا وعطرها عاطيك
تلج الأرز شو داب عَ تمَك
من شوق روحي كتَبت تَ هَنيك
وتشرين متشوّق على ضمَك
قالو ما عندَك إم تَ تبكيك
نسيوا دموع الأم بتلمك
صدفه الهوا لولا إجا يحييك
إمَك بتبعَت شَمس تَ تدَفيك
بتدفى الدني بغمرِة دفا إمَك
