وضمَّيتك بقلبي…

لميا أ. و. الدويهي

وضمَّيتك بقلبي

وغفَّيتَك بين ضلوعي

تا تتغذَّى من روحي

وإحميك بنور عيوني

من كل آهات هالدِّيني المجنونة…

ما فيِّي زيح بإيديِّ

ظلال الماضي المضنيِّة

ولا فيِّي ردّ ساعات عمرَك المِمحيّة

ولا شيل من قلبَك الأذيِّة

أو بَلسِم جراح بطيَّات روحَك مخفيَّة…

بس حدَّك فيِّي كون

ورافق خطواتَك للنُّور

مطرح ما الرُّوح

بتلامس الرُّوح

بتعانق الذاتَ

بأعماق الكيان…

مطرح ما بتفيض

ينابيع الحبّ السَّرمديِّة

اللي فيها نَسمات أزليِّة

بتختم آهات،

بتزيح عتمات

بتطوي نهدات

بتوحِّد الذَّات مع الذَّات

بتردَّها للحياة …

١٦/ ٢/ ٢٠٢٠