بين الواجب والمجَّانيّه…
لميا أ. و. الدويهي
في ناس بتفل
وهيِّي ومعك…
بتضل حدَّك
وما بتنفعَك…
بالواجب بتحاكيك
وبالجميل بتناديك،
وهيِّي صارت متل الغريب
اللي عن روحك وإحساسك بعيد…
غبِّت من نبعك الأمان،
ولما آن الآوان
يتمّ الاكتمال،
حلَّقت مسافات
وبقيت حدَّك جماد،
مدفوعة بالامتنان
لا روح ولا كيان
والقلب بغير مكان…
الحبّ هويِّ الحنيّة
اللي بتفيض بمجانيّة…
ما بدو غير الحريَّة
اللي بتوحِّد الإنسانيّة…
حملو خفيف،
ما بيفرض ذاتو عالحبيب
ولا بيرضى يكون ضيف تقيل…
وان ما اتَّحدوا بعروقو المحبِّين،
تغرَّب عجناح المصير
مطرح ما بتنفرشلوا الأحاسيس
مخدّة عليها بيستريح…
١١/ ٣/ ٢٠٢٠
