خَمسينِيّه

إميل فهد

 

بيحُط راسو بالأرض بالأرض مَخجول

بيِمرُق كأنّو قال ما شافِك

هالعُمر يللي كِلّ ما بيطُول

كِل ما رَسَم أحلام عَ زافِك

 

شامِم بِعطرِك مَعصَرِة ايلول

والإيد تِعزُم إيد عَ قطافِك

وعَ رَمل بالِك مِتل دَعس خيول

وتربَع نَوايا الليل عَ طرافِك

 

خَمسين شو عمر المَرا .. مَعقول ؟

خَمسين غَمرَه تهُرّ عَ لحافِك

وغِمّازتَين العَم يشِدّو نزول

بَيتَين شِعر بسَطر نِفنافِك

 

كبِرتي .. إي والله بِقتلو البيقول

شو شاف مِن حَوّا اللي ما شافِك ؟

بَعدو طفل قَلبِك خَرج مَريول

وبَعدا صَلا الشيطان عَ شفافِك …