“طيور  النار”!!!

نبيل  غصن

 

لما طُيور  النار   

غطت  جوانحها  السما ..

خَبِّتْ عيونا الشمس   

خوفا من العمى

وعصفِت رياح السود   

 قصّفِتْ  الورود

 والراح  كيف بيعود ؟؟

 

يا شياطين الخوت       

دمْرتو  البيوت

حرقتو  قلب  بيروت

 

شوفوا الدني غْبَرِّتْ 

وأشجارها تعَرِّتْ

وتكْيِتْ على  بعضا   

الأزهار  وصْفَرِتْ

 

وتْخَرْسَن العصفور 

عم يرجف وموجوع

والنبع  بدل المي 

سقسق  دِما   ودموع

 

مش  ناقصنا  هموم 

وخوف  ووجَع   وسموم

 بدنا  الأمان  يطِّلْ 

ويغمر  بدفئو  الكِلْ

 

وتغزل  الشمس حكايتا   

فوق  الأراضي  لْ حبتا

تَ  تفيّقا  من  غفوتا

 

 تنتفِضْ   وتقوم

تْرَجِّع  سما  لبنان

مْطَرَّزي   بنجوم  ..!!

(website)