وتر
سليمان بختي
بيوعى وجع فيي
وبقول آخ يا بيي
بعدك بطّلت الايام
تركض وتسعى فيي
صرت متل وتر الزمان
بيرن بيعن بينام
وبيخاف اتطلع فيه
ويتطلع فيي
بيوعى وجع فيي
وبقول آخ يا خيي
كيف رحت
وما عرفت شو صار فيك
ولا شو صار فيي
وبقول يا ريت تمسكت فيك
يا ريتك تمسكت فيي
يا ريت لما انوجعت
صرخت آخ يا خيي
بيوعى وجع فيي
بيقعد حدي
بيروح وبيجي متل خيالي
وبتشتي الدني عليي
وبيحكيلي وبحكيلو
وبيشد الحبل فيي
بترجاه يهدا يكن ينام
ومرات بغنيلو
يللا ينام يللا ينام
لا دبحلو طير الحمام
بيوعى وجع فيي
وقدامي بلاد
“بلاد مقوصة وكيف بدها تقوم”
بلاد بحن الها وبتحن عليي
ترابها كحل عينيي
وتحت سقفها برفع راسي وايديي
وبخاف يجي وقت
بين السهر والنوم
ضيع طريقها وتضيع احلامي
لا عود اعرف بلادي
ولا هيي تتعرف عليي.
