الإنسان
لميا أ. و. الدويهي
الإنسان ما بيقدر يتحكَّم ببشريتو
بس بيقدر يقدِّس إنسانيتو
ما بيقدر يغيِّر تركيبتو
بس بيقدر يضبط إنفعاليتو
ما بيقدر يحوِّل طينتو
بس بيقدر يطوِّر طبيعتو…
الإنسان بيحوي تناقضات
بتتشابك بس بتتكامل
عندو إرادة ليحاول…
بيملك طاقات
بتوجّهو صوب الإله
ووعي بيهذِّب الإحساس…
تركيبتو بتمنَح الحياة
وهيدي نعمة ما بتنقاس
هوِّي مَنفوح من القدُّوس
بس لو بيتطلَّع بالرُّوح
بيتعالى فوق المَحسوس
بيصير بإنسانيتو مَلِك بين الملوك…
١١ /٤ /٢٠٢١
