في ناس
زياد كاج
في ناس بعد ما تفل،
بيتركوا خلفن
ظل ما بيفل ،
بيبقى ع الكراسي
بالبيوت والمقاهي،
أبيض متل الفل .
بيضل يكبر
بيونسك لما تمل،
بيمسح جبينك
أكسير أمل،
متل عطر الياسمين
مع أول فجر
صبية حلوة شي أنو تطل.
في ناس بعد ما تغيب
بيستحي منها المكان
وبتخجل العتاب
ولا عتاب،
لمن يجي المشتاق
وبيمسح بإيدو وج الطاولة
يل شاف الضحكات والهمسات
واللمسات….
بركي الضرير بيرجع أشواق
نظراتو.
متل شحاد
ع مهل بيمشي
بيتلفت شمال ويمين
بيفتش مدري ع مين !
بحشرية أرملة التلاتين
بتميل
كيف ما الهوا بيميل،
ليلاقي حدا
يحكي معو…
بين الغربا
عن يلي غابوا،
وبقيوا معو،
وبيغربل الناس
بغربال عتيق مجنزر،
وما بيبقالو الا
بسمات عاج من أحبابو.
في ناس لما تروح لبعيد
لمحل ما بيشبه محل
بتاخد معا موسم قطاف
الفرح والعيد،
بتاخد معا الدفا وزهرة الحب
وقبلات المواعيد،
وبتترك بالقلب
جمرات ما بتطفي نارها
ميات عيون الربيع.
يا زمن،
ليش حرمان حبيب من الحبيب؟
مكتوب ع الناس تعيش
غريب مع غريب ؟
يا زمن
ليش في ناس بتخنق الأنفاس
بتقتل متل ضرب الفاس؟
وفي ناس
مش متل كل الناس،
فراشات عالزهر كيف ما حلّوا،
آهات وبسمات
سجاد الياسمين بينمد لهن
وين ما حلّوا.
في ناس متل الصخر
بينهم والإحساس تارات،
وفي ناس متل خفة غيم الصيف
تحتن الناس بيقعدوا
بيحلا العيش،
بيرتاحوا ويتسلوا.
في ناس…
