ما تخاف إنَّك تكون

لميا أ. و. الدويهي

 

لمَّن قلبَك من جوَّا بيألمَك

وبتسكِّر عآهاتَك ابوابَك

وبتصير مَخبِّي وجعَك حتَّى عن حالك

وبتكبت إحساسك وبتقمعو جوَّاتك

وعن حالك بتفصل حالك

ما بتعود تعرف بالحياة شو رغباتَك

وبتصير بتمشي لأنَّك موجود

ومفكَّر حالك إنَّك مش مَهموم

وإنتَ شوي شوي من جوَّا عم بتموت…

بتختار الإشيا لأنَو «الدِّني» هيك بدَّها،

بتركض تا تقول أنا موجود

بس مش متل ما إنت مخلوق…

بدَّك ترضي الناس

وتصير وكأنَّك أساس

وإنت بالحقيقة صورة من برَّا

ومن جوَّا ما إلها معنى…

ما تخاف!

كسِّر، حطِّم…

غيِّر، عَبِّر…

بحالَك اوثاق

إنتَ موجود حتَّى تكون

متل ما الله خلقَك تا تكون

حرّ، سيِّد نفسَك واثق من حالك

بتعرف إنُّو ربَّك بحبَّك

عطاك صفات

ميَّزك بين الأشخاص

وقلَّك بالأوَّل، تا تكون مرتاح

حرِّر حالك من حالَك

واضبط إيقاع تقلُّباتك

وما تخاف إنَّك تكون

أنا حبِّيتك من قبل ما الكون يكون…

 ١٤/ ١٢ /٢٠٢١