يا ريت يطلع الضو
سليمان بختي
كنا صغار
ونقيس العمر بالشبر
ونعلّم بالقلم والخيط
خشبة الباب
وتقول ستي: “كل شبر ب ندر”
ونزعل اذا ما كبرنا
ونرضى اذا طوّلنا
ونكبر نحنا وعم نلعب
ونغفى نحن وعم نتعب
يا ريت بقينا بزمن الطفولة
وما عرفنا انو العمر
ما بينتهي بالشبر ولا بالندر
بينتهي مترين بمتر
***
كنا صغار
ونخاف من العتمة والغول
والضبع وابو كيس
كلن راحوا وضل ابو كيس
غيّر شكلو وملامحو
لبس طقم وكرافات
سرق تعب العمر
وسهر الليالي
سرق القرش الابيض
وترك اليوم الاسود
***
كنا صغار
وكان البيت كبير
وبيساع اجنحة واحلام
ونشوف الامل جايي
متل الشمس جايي
متل رجعة بيي ع البيت جايي
مع الأغاني والمواعيد
كبرنا وضاع الحلم
وصرنا نعدّ الأيام
ونعدّ المصايب والهزايم
معقول اللي عم بيصير فينا
يا ريت كل اللي صار كذب
يا ريت يكون منام
ونفيق وما ينقص حدا منا
يا ريت يطلع الضو
يا ريت تشتي الدني.
