قبل الحكي شو كنت أسمعلَك
عنتر رزق الله
يوم عيدَك ضحكت قبالي السما
من جرح قلبي صرت أضحكلَك
بعمري معك علَّمت قلبي عَ الوما
قبل الحكي شو كنت إسمعلَك
***
بعيدَك اجتمعو والأحبا كتار
وإنت بعدَك ب الشغل مشغول
وب ليل عيدَك في قَمَر محتار
من جبهتَك هالشَمس شو بتغَار
جمعت الهوا والنار يا جبار
بصلي إلَك عمرَك يا بيّي يطول
***
كنت بلسم للقلب عند الوجَع
وعلمتني كيف بيقطفو النجمه
ولما القسى والخوف قدامي ركَع
علمتني مجد الدني ب إسمي
***
شو بقول عنَك بعد يا بيّي
شغَلت الدني بدَعسة وجودَك
بعطفَك يا بيّي غمَرت عينيي
رب السما وسعلَك حدودَك
