حدَّك أنا…
لميا أ. و. الدويهي
بتعزّ عليِّي النَّسمة اللي بتنشَّقها
وأنت مش عم بتشاركني فيها
بغصّ بالفرحة اللي عم عيشها
ونحنا مش عم نتقاسمها
كيف ما بدُّو يزيد الوجع
وانت جوَّاتك الدَّمعة عنِّي حابسها
حدَّك أنا،
بس لو بتطلع من الأنا
وبتشوف قدَّيش الدِّني أحلى سوا
والمحنة أخف وطأتها
والعتمة ما منبلغها
كل ما نحنا متّحدين
وعالحلوة والمرّة متِّفقين
بحبَّك!
والحبّ بيفرح إنُّو يعطيك
ومن فيضو يملِّيك…
بيتمنَّى يسمَعلَك ويحميك…
وبوقت الشدّة والضِّيق
بدُّو يتِّحد أكتر فيك،
حتَّى تقوى عالوَجع والأنين
ولمَّا العواصف عنَّا بتميل
بتشرق شمس حبّنا
وبتدفِّي ظلال عمرنا
وبكل مراحلنا بتجدِّدنا…
