مْشيت بْضباب
د. جميل الدويهي
هَيدا برْج؟ أو كِحْلة عيون المَها؟
أو شو بِقي من رْماد قلبي اللي اشتهى؟
وبتضْحكي عا قدّ ما عندي عذاب
يللي جمالك من جمال الالِهه…
ساعة دهب عم تلبْسي، وأغلى التياب
من وين جبْتي هالغِنى… والأبّهه؟
من بعد ما حِبّيتك مْشيتْ بضباب
وحارس معي تا يدلّني… عنّي التَهى
حَبّة عنب ما قدرتْ طال بْشهر آب
وما عْرفتْ بالتبْصير شو طعْم اللِها…
وعم إنْطرِك بالليل قدّام البْواب
وبْقول للحيطان: مِدْري شو بِها…
ما زال بحْكي هيك وحْدي بقلب غاب
والشمس مش معروف عا أيّا جهَه
يا صالحيني… وشرّفي بعد الغْياب
يا شَطّبي عالحُبّ… تا قُول: انتهى.
