هيك قالتلو:
مارون أبو شقرا
يا رزقتي ، اللي زيّنت بطني!!!
عم يتهموني.. وفيك بتعلّى !!!
كلما بليلي تقوم تلبطني،
حسّ قلبي فاق يعبطني
وإسمع بإجرَك دندنِةْ ألله !!!
يا روح روحي يا حلم، لا تخاف
من سقعِةْ الكلمات المْسِمِّه…
نجِّد أصابيعي تَ تدفا لحاف ،
وحتى ما يدقر كعبك النفناف،
فرفط شفافي قشّ يا إمي !!!
حطّك عَ صدري.. ترضع ..وعدُّن
كم رمش عندك .. تنقز.. تشدُّن ….
الحيّات برّا ، يسَلْحبو تَ يعقَصوك ،
عَ مصر أهرب حافيه ، بدُّن
يا خبز عمري ، يولّعوني ويحرقوك …
جدِّب إيديك ، ومطّن ومدّن،
حتى ما نوجع يومِةْ اللي بيصلبوك !!!
