همس الكلمات ولفتة البَسمات
لميا أ. و. الدويهي
*
بضُم قلبَك بعيوني
وبمسَح جبينَك بحَنيني
برفَع الكلمات
تا تحلى البسمات
وتفيض بعُمرَك حكايات
تراقص النَّبضات
وتهامس الإحساس…
وجودك بلسَم بيحي الكيان
وَجدَك فرحة بتكمِّل الضِّحكات
لفتاتَك نَسمات
بتطلّ من مَهبِّ الجنَّات
بتجدِّد النَّهدات
بتضحَك الغمزاتَ
بتهادي النَّظرات
بتبتِسم الآهات…
قلبَك وقلبي طاقات
بتنشرُ حوالَينا ذرَّات
بتسابق عتمات
عم ترخي مشلحها غياب،
تا تِحلى المواعيد
وتُضوي ببيت جديد
تْسَلِّمها رايات
تنسج فيها روايات
بتدغدغ الفؤاد بلفتات
حتَّى يزَهِّر الحبّ بكلِّ الواحات
ويكتمل تا يصير حياة…
٣٠/ ٧/ ٢٠٢٠
