مَوجة غريبة

لميا أ. و. الدويهي

 

في جوَّاتي مَوجة غريبة

بعيدة ومِنِّي قريبة

مش عم أعرف أوصفها

ولا من وَين مَصدرها

جايي من صَوبَك

حاملي بطيَّاتها كِلَّك

عم تهمس بأعماقي…

بتوشوشني…

وسِرَّك بتنقلّلي

ولعندَك بتشدّني

وبتخلِّيني روح

لمَطرح ما بتاخد نَفَس الرُّوح

وبتلاقيني إنت عدروب

بتدلني بالحبّ عالينبوع

وبرتوي منُّو حتَّى فيك دوب

وصير منَّك وفيك

إِلَك ومَعَك بكلِّ حين

وبغرف من حُبَّك الأديم

تا بعُمري المَغيب يحين…

 ١٩/ ١٠/ ٢٠٢٠