لما نعس قلبي
سليمان بختي
لما نعس قلبي نام
وغطس بالنومة
وتعربشت الاحلام بإيامو
صار يعتل هم القومة
شو قولك النوم موت صغير
والحلم عمر تاني
شو قولك الحلم جائزة ترضية
عن عمر عاشو حدا تاني
عن عمر…آخ ضيعانو
عن عمر اكلت الكوابيس ساعاتو
غبنك يا عمر وليت
ما لحقت جيت
حتى حملت حالك وفلّيت
* * *
لما نعس قلبي حبيت
فات ع قلبي هوى
وصار قلبي سما وبحر وبيت
ويبرم متل دواليب الهوا
وصرخت: يا سامعين الصوت
شو ذنب الهوى
انا هويت…انا حبيت
ورحت مع يا رايحين ع حلب
وضل قلبي معي وغلّطت
وضيّعت الطريق
بتحب لما قلبك بيبطل الك
لما بتصير وحدك غريق
وبيفت قلبك متل شمع العسل
بيفت متل خبز العصافير
بتحب لما ما تعود انت الك
* * *
لما نعس قلبي حنيت
لريحة اول شتوة
لأول غصن أخضر بيحتل الربيع
لبحر بيروت المغطى بلحاف الغيم
وشو بيرسم حلو واحلى من يا ريت
لبيتنا الكبير…لأهلي
وانا الصغير
اركض من ايد لأيد
حتى تأخرت لمشيت
حنيت لكبار كتار
راحوا وضلوا بقلبي
اخدوا الدخنة و تركوا النار
حنيت للشتي النازل
متل اللي آخد هالدني مشوار
وانتي وحدك ع سطح قلبي
عم تعصري وتمسحي وتحدلي
وتطيري طيارير.