بيت من نور
سليمان بختي
كان اسمو بيت جدّي
بيت من نور ابيض
اولو ياسمين وآخرو زنبق ابيض
متل خصلة شعر ستي
تحت الغطا الابيض
متل يا سلام ع الايام
متل مسبحة جدي
معلّقة بين الحلم والمنام
مين متلنا عند بيت جدي مين
لا امراء ولا ملوك
ولا خيل ولا اقواس نصر
انت ملك بقلب اللي بيحبوك
راح جدي
قبل اذان العصر
وصار اسمو بيت ستي
وبعد كم سنة
راحت ستي قبل ما تكمل صلاة الضهر
انطفى ضو البيت
فضي البيت
ما يعرف بيت جد مين
او بيت ست مين صار
المهم يضل متل كل منازل القلوب
بيت من نور
