لبنان ما بدُّو صلاة…

لميا أ. و. الدويهي

لبنان ما بدُّو مين يصلِّيلو

لبنان ما بدُّو مين يدعيلو

لبنان هوِّي الصلاة للي ساكنينو…

لبنان ناهز الكَون بخلودو

وعبَّى مداه بحضورو،

قبل التَّكوين ما يكون

والعالم يتقَّسم حدود…

هوي أرض الله المختار

شقفة من المَلكوت، جبار

مركزو مركز الأخيار

نقَّاهون من دون قرار

وقلُّون تا تصيروا أحرار

حِلُّوا من بين الأسرار

سر الله بلبنان عَمَرِّ الأدهار… 

لبنان بدُّو مين قلبو يهديلو

حتَّى تمتلي وتشعشع قناديلو…

إنسان لبنان بحاجة لصلاة

تا يرجع شوي لورا

ويقشع كيف أَبدع الخالق لوحة

عُمرها من عُمر الزمان

بحبّ وتأنِّ تفنَّن فيها وزادها جمال…  

يا منفهمو ومنعيش متل الأبرار

يمَّا منمشي من دون خيار

ورح نسقط قدام جحافل من الأشرار

عم تِغْزي نفوس ما عرفت تندار

 صوب الرب الساكن هالدار

وضيَّعت المسَار

وأسقطت الأسوار

قدام جَهل كل غدَّار

لبِس مشلح الدمار

وقرَّر إنُّو الحل بالفرار…

لبنان بتبقى العيشي فيك مشوار

صعب وقاسي، وفيه مَرار

بدُّو قلب حاضر يمشيه بثقة وإكبار…

لبنان، أرض الله وقبلة الأنظار،

بيستحق نحفظ مجدو أمانة للأجيال…

 ٧ /٧ /٢٠٢٢