يا رب 

 نبيل غصن

 

 

سمعني عم حاكيك

يا شمس الحريّه

رح افتحلك قلبي

 تَ بقلبي خبّيك

 

وجودَك بيقوّيني

ورضاك بيكفيني

بالإيمان غنيني

قلبي معلّق فيك

 

على جناح النسمِه

ودّيني لَبعيد

لا تناديني بإسمي

خْلَقني بإسم جديد

 

زْرَعني بأرض النار

زهره بتحمل إسمَك

تَ يعِمّْ الخَضار

ويتلوّن برسمَك

 

معَك رح إتحدّى

لبيتاجرو بالدِين

وايدَيّي رح مِدّا

لَكِلّْ المظلومين

 

وصَرِّخ بوِجْه المدى

يا حروب اختفي

ويا شعوب وقَفي

ورَيّح يا وجه الرضا

هالناس التعبانين ..!!