شافوا العمر

سليمان بختي

 

في ناس شافوا العمر

وقالوا تعتير بالقناطير

وفي ناس  وقفوا بعين الشمس

وقالوا عز كبير

وفي عمر مخبّى متل وردة

ورقة ورا ورقة

ما بيلحق يفتّح ليروح

وفي ناس راحوا وما ودّعوك

وفي ناس كل ما شافوك بيودّعوك

**

في لقمة مغمّسة بالدم

وفوقها شتّي يا دني

وفي لقمة ميسّرة بلا همّ

ومحلاها الدني

وفي وقت جبال ما بيقطعوا

وفي وقت ما فيك تلحّقوا

وفي زمن بيضحكلك وبتضحكلو

ومرّات بيبكيلك وبتبكيلو

**

كم مرة طافت هالدني وما غرقت

وكم مرّة وصلت للموت وما عرفت

يا قلب أعز الناس حبايبنا

والأعز يللي ما منعرفن

الواقفين بالضفة التانية… حبايبنا

**

لولا الحب والشوق

شو قيمة الوجع والمسافات

لولا البحر

شو قيمة الدمعة

لولا الأمل وضو الشمعة

شو نفع الحياة

**

في تراب بتحملو

بصير دهب

وفي تراب بيحملك

وبضلّو تراب